БИШКЕК, 16-мар. — Sputnik. Бишкек шаарынын Октябрь райондук соту депутат Өмүрбек Текебаевдин жактоочусу Таалайгүл Токтакунованын мүлкүн камакка алганын ал өзү Sputnik Кыргызстан агенттигине билдирди.
Башкы прокуратура 9-мартта Текебаевдин адвокатынын жана эки ЖМКнын үстүнөн президент Алмазбек Атамбаевдин ар намысына шек келтирди деп сотко арыз жазган. Алар өлкө башчынын ар намысы үчүн жактоочунун 10 миллион сом төлөп берүүсүн талап кылууда.
Токтакунованын айтымында, анын мүлкүн камакка алуу боюнча сот чечими 14-мартта чыккан. Депутаттын жактоочусу доогердин доолаган акчасын төлөө үчүн үйү сатылып кетиши ыктымал экенин кошумчалады.
"Демек, эгер сот чечимди Алмазбек Атамбаевдин пайдасына чечсе, менин мүлкүмдү сатуудан түшкөн каражатты ага беришет. Доо арыз негизинен туура эмес берилген, анткени биз Өмүрбек Текебаевдин ишенимдүү адамы катары чыктык. Болгону анын коомчулукка айта турчу нерселерин гана жеткирип анын талабын аткардык. Бул учурда укуктук мамилелер Текебаевдин адвокаттары менен эмес, анын өзүнө байланышы керек болчу", — деди жактоочу.
1-мартта Өмүрбек Текебаевдин жактоочулары эл өкүлүнүн атынан маалымат жыйын өткөрүп, 16-январда "Манас" аэропортуна жакын жердеги Дача айылына кулап түшкөн учактагы жүк президент Алмазбек Атамбаевге таандык экенин маалымдашкан. Башкы прокуратура Таалайгүл Токтакуновага жана Канатбек Азиздин ошондой эле "Азаттык" жана Zanoza маалымат булактарын жалган маалымат таратканы үчүн сотко берген.
