БИШКЕК, 19-дек. — Sputnik. Раим Матраимовдун мал-мүлкү текшерилет. Бул тууралуу президент Сооронбай Жээнбеков журналисттерге маалымат жыйын өткөрүп жатып айтты.
Өлкө башчыга Матраимовдор тууралуу суроо берилип, эсеп жеткис байлыгы текшерилер-текшерилбесине кызыгуу болду.
"Раим Матраимов үйлөрүн мен президент болуп келе электе салган. Андыктан текшерилет", — деди Жээнбеков.
"Мен мамлекет башчы болуп келгенге чейин эле ырас иштеп жатып, андан кийин эле иштен алынбадыбы. Матраимовдор 2011-жылы президенттик шайлоодо КСДПга жан дили менен иштеп берген. 2015-жылкы президенттик шайлоодо да жакшы иштеп, Искендер Матраимов Жогорку Кеңешке 27-тизме менен депутат болуп келген. Сегиз жыл жакшы болуп, мен келгенде эле жаман болуп калабы?" — деп суроо салды ал.
Жээнбеков мурдагы бийликтегилер Раим Матраимовду өздөрү Оштон Бишкектеги бажыга алып келишкенин айтты.
"Таң калам! Карап көрсөм, мурдагылар аппак, азыркылар — Жээнбеков жана башкалары жаман. Баары калыс болуш керек да. Менин угушумча, дагы көп нерсе чыгат", — деди президент.
Учурда "Ала-Арча" мамлекеттик резиденциясында өлкө башчысы журналисттер үчүн маалымат жыйын өткөрүп жатат. Бул анын президент болуп келгенден берки жыл жыйынтыгы боюнча алгачкы жыйыны. Жээнбеков 2017-жылы 24-ноябрда расмий түрдө президенттик кызматка киришкен.
