БИШКЕК, 26-сен. — Sputnik. Жогорку Кеңештеги "Ата Мекен" фракциясынын депутаты Бахадыр Сулейманов башка мамлекеттин жараны экенин тастыктай турган документтер КР Башкы прокуратурасы менен Ички иштер министрлигине берилгенин акыйкатчылыкка талапкер Токон Мамытов эл өкүлүнүн суроосуна жооп берип жатып билдирди.
Сулейманов Мамытовго жакында эле ал аны чет элдик мамлекеттин агенти, башка мамлекеттин жараны экендигин ЖМКларга маалымдаганын айтып, "эгер ошондой факты болсо документтерди эмнеге көрсөтпөйсүз" деп суроо салган.
Мамытов өз кезегинде Сулеймановду башка мамлекеттин агенти деп айтпаганын белгилеп, маалыматты бурмалабоого чакырды.
"Сизди агент деп мен айткан эмесмин. Сиз чет мамлекеттин жараны экениңизди тастыктай турган материалдар менде бар. Аларды эки ай мурда БШКга бергем. Бир канча күн мурун документтердин бардыгы тийиштүү кызматтарга берилди. Казакстандын ИИМинин жообу, КРдин жарандык берүү боюнча комиссиясынын катчылыгынын жообу кандай болгонун сиз билесиз. Азыр документтердин бардыгы башкы прокуратура менен ИИМге берилди", — деди Мамытов.
"Мен СССРдин жараны болгом, Советтер союзу урагандан кийин бул жактан Кыргызстандын жарандыгын алгам", — деди эл өкүлү.
Эске салсак, учурда депутаттар акыйкатчылык кызматка төрт кишинин — Рита Карасартованын, Рыскул Бактыбаевдин, Токон Мамытовдун жана Канатбек Азиздин талапкерлигин карап жатат.
