БИШКЕК, 5-дек. — Sputnik. Жогорку Кеңештин Конституциялык мыйзамдар, мамлекеттик түзүлүш, сот-укук маселелери жана регламент боюнча комитети премьер-министр Сапар Исаков тарабынан биринчи вице-премьер кызмат ордуна көрсөтүлгөн Аскарбек Шадиевдин талапкерлигин жактырды. Бул тууралуу парламенттин маалымат кызматы билдирди.
Премьер-министр бул кызматка Шадиев дайындалып калса, отун-энергетикалык комплекси жаатындагы маселелерди тескей турганын белгиледи.
"Ушул жылдын 1-декабрынан тарта күчүнө кирген Конституцияга киргизилген өзгөртүүлөргө ылайык, эгер депутат биринчи вице-премьер-министрликке дайындалып калса, өзүнүн мандатын жана добуш берүү укугун сактап калат. Шадиевдин тагылган милдетти аркалап кете аларына кепилдик бере алам. Мында парламент менен өкмөттүн өз ара байланышы да кыйла чыңдалат", — деди ал.
Исаков Шадиевге айлык акы өкмөттөн гана төлөнөрүн кошумчалады.
"Бир Бол" саясий партиясынын тизмеси менен Жогорку Кеӊештин депутаттыгына шайланып келген Аскарбек Шадиев ушу тапта Эл аралык иштер, коргоо жана коопсуздук боюнча комитеттин төрагасы болуп саналат.
