БИШКЕК, 13-мар. — Sputnik. Жогорку Кеңештин "Ата Мекен" фракциясынын депутат Аида Салянова УКМКнын имаратында дээрлик үч жарым саатка чукул суракта болду деп билдирди анын жактоочусу Улан Жумаков Sputnik Кыргызстан агенттигине.
Буга чейин парламентарий жана анын экинчи жактоочусу Чынара Жакупбекова саат 15.50дө суракка келгени маалымдалган. Жумаков анын майда деталдары туурасында толук билбей тургандыгын, себеби депутат жана анын адвокаты маалыматты сыртка чыгарбоо жөнүндө кагазга кол койгондугун айтты.
"Сурак 3 саат 24 мүнөткө созулду. Кийинкиси качан болору азырынча белгисиз", — деп кошумчалады Жумаков.
Белгилей кетсек, 2016-жылы декабрь айында Башкы прокуратура Аида Саляновага Юстиция министри болуп турган кезде Алексей Елисеевдин адвокаттык лицензиясын кызмат абалынан кыянаттык менен пайдаланып калыбына келтирип берген деп кылмыш ишин козгогон. 8-февралда Саляновага карата козголгон кылмыш ишти иликтей турган депутаттык комиссия түзүлгөн.
Февралдын башында Салянованы УКМК суракка чакырып, ал беш саатка чукул созулган.
