БИШКЕК, 8-фев. — Sputnik. Жогорку Кеңеште "Ата Мекен" фракциясынын депутаты, мурунку башкы прокурор Аида Саляновага карата козголгон кылмыш ишти иликтей турган депутаттык комиссия түзүлдү.
Бүгүнкү отурумда айрым депутаттар спикер Чыныбай Турсунбековдон комиссия түзүү маселесин күн тартибине киргизүүнү өтүнүшкөн. Демилге "ата мекенчи" Алмамбет Шыкмаматовго таандык.
Депутаттык комиссия түзүүгө каттоодон өткөн 110 эл өкүлдүн 103ү макул болгон. Ага беш фракциядан тогуз депутат кирди. Комиссияда КСДПдан бир да өкүл жок.
Белгилей кетсек, 2016-жылы декабрь айында Башкы прокуратура Аида Саляновага карата юстиция министри болуп турган кезде Алексей Елисеевдин адвокаттык лицензиясын кызмат абалынан кыянаттык менен пайдаланып калыбына келтирип берген деп кылмыш ишин козгогон.
