БИШКЕК, 26-ноя. — Sputnik. Орто-Сай айылынын четиндеги "Боз-Бөлтөк" тоосунда жайгашкан Кыргызстандын туусу жоголуп кетти. 26-ноябрь күнү флагшток калып, туу жок сүрөттү социалдык тармактын колдонуучусу жүктөгөн.
Ал сүрөттүн алдына "Бабанов Орто-Сайдагы желегин ала кеткен окшойт…" — деп жазган.
Аталаган желек 2012-жылы 31-августта Кыргызстандын эгемендүүлүгүнүн 21 жылдыгына арналып орнотулган.
Бийиктиги 75 метрлик флагшток жана 337 чарчы метрлик туу ошол убактагы өкмөт башчы Өмүрбек Бабановдун демилгеси менен Түркияда жасалып, баасы сегиз миллион сомду түзгөн.
Бабанов премьерликтен кеткенден кийин желек Улуттук банктын балансына өткөрүлгөн.
Улуттук банк азырынча жоголгон туу боюнча маалымат бере элек.
