Бул ирет өлкөдө аралаш шайлоо системасы киргизилди. Депутаттар партиялык тизме боюнча (54 мандат) жана бир мандаттуу округдан (36 мандат) шайланды.
Ар бир шайлоо округунан бирден жеңүүчү шайланат. Жалпысынан Кыргызстанда бир мандаттуу 36 шайлоо округу бар, ар бир округда ашык-кеми менен 100 миң шайлоочу болот. Белгилей кетсек, шайлоого бир мандаттуу талапкерлерди партиялар гана көрсөтпөстөн, өзүн-өзү көрсөткөн талапкерлер да катышты.
Башында бир мандаттуу округ боюнча 320 киши талапкерлигин коёрун билдирген, бирок кийинчерээк айрымдары баш тарткан.
Бир мандаттуу округ боюнча шайлоонун жыйынтыгында эң көп добуш алганы парламенттен орун алат. Эгер бир нече талапкер бирдей добуш алып калса, Борбордук шайлоо комиссиясына катталуу үчүн биринчи болуп документ тапшырганы жеңүүчү аталат.
АСУ болжолдуу жыйынтыктарды жарыялагандан кийин Шайлоо жана референдумду өткөрүү боюнча борбордук комиссия добуштарды кол менен санайт. 18-декабрга чейин БШК парламенттик шайлоонун партиялык тизме боюнча да, бир мандаттуу округ боюнча да акыркы жыйынтыгын айтышы керек.
Кыргызстанда быйыл ЖКга шайлоо кайрадан өткөрүлүп жатат. БШК 2020-жылы октябрь окуяларынан кийин парламенттик шайлоонун жыйынтыгын тааныган эмес.
Редакциянын парламенттик шайлоо тууралуу материалында АСУ санаган болжолдуу жыйынтыктар көрсөтүлгөн. Андан кийин кол менен саналган жыйынтыктар жарыяланат.
