2018-жылдын ичинде облустарда канча киши кургак учук жуктуруп алганын Улуттук статистика комитетинин адистери иликтеп чыкты. Ведомствонун маалыматына караганда, былтыр дарыгерлер бул ооруга биринчи жолу чалдыккан 5249 адамды каттоого алышкан.
Кургак учукка кабылгандар эң көп Чүй облусунда жашайт, тагыраагы, 100 миң кишиге 123 оорулуу туш келет. Андан кийинки орундарда Бишкек жана Ош шаарлары турат.
Ош, Жалал-Абад, Нарын, Баткен жана Талас облустары дагы тизмеде бар. Кургак учук эң аз катталган аймак — Ысык-Көл. 100 миң адамга 49 учур.
Кыргызстандыктар бул ооруну эң көп жуктурган мезгил 2001-жылы болгон. Анда сегиз миңден ашуун адам ооруга алгачкы ирет кабылган. Акыркы жылдары, тескерисинче, оору мизин кайтарып бара жаткандай.
Былтыркы жылы аялдарга караганда эркектер көбүрөөк жуктурган. Бирок ооруп калгандардын басымдуу бөлүгү аял-эркегине карабай 18 жаштан 24 жашка чейинкилер.
