БИШКЕК, 16-окт. — Sputnik. Борбор калаанын милициясынын убактылуу кармоо жайына Пакистандын эки жараны киргизилгендигин Октябрь райондук милициясынан кабарлашты.
Милиция 2019-жылдын 14-октябрында саат 15:40та Исакеев менен Виноградная көчөлөрүнүн кесилишинде чет элдик студенттер мушташып жатат деген кабар түшкөндүгүн эске салган.
"Пакистан жарандары Р.А. менен А.И. аталган ЖОЖдо окуган студенттер боюнча уруша кеткен. Анын кесепетинен милициянын төртүнчү бөлүмүнө Пакистандын 30га жакын жараны чырдын чоо-жайын аныктоо үчүн жеткирилген", — деп айтылат маалыматта.
Аталган факты Кылмыш менен жоруктардын бирдиктүү реестрине Жазык кодексинин 2-беренеси менен ("Бейбаштык") катталып, сотко чейинки иш-чаралар башталган.
"Бул ишти жасады деген шек менен Бишкек шаарынын милициясынын убактылуу кармоо жайына Пакистандын 19 жаштагы эки жараны — К. М. менен М. М. киргизилди", — деп айтылат маалыматта.
Милиция сотко чейинки териштирүүлөрдүн жыйынтыгы кечирээк белгилүү болорун айтып, андан сырткары, Эл аралык медицина университетинин жетекчилигинин аракеттерине баа берилерин билдирди.
Буга чейин аталган ЖОЖдон мушташ болбогондугун, көбүнчө кыйкырып жана жөөлөшкөндүктөрүн жана эч ким жаракат албагандыгын билдиришкен.
