БИШКЕК, 30-апр. — Sputnik. Жогорку соттун соттук коллегиясы экс-депутат Садыр Жапаровдун адвокаттарынын арызы боюнча кылмыш ишин кайра карап чыкты.
Белгилей кетсек, Садыр Жапаров 2013-жылы октябрда болгон митинг учурунда Эмилбек Каптагаевди барымтага алууну уюштурууга тиешеси бар деп айыпталып, 11 жыл 6 айга кесилген. Учурда ал Молдовановка айылындагы биринчи колонияда жазасын өтөп жатат.
Экс-депутаттын жактоочулары быйыл 1-январда күчүнө кирген Гуманизация жөнүндөгү мыйзамга таянуу менен мөөнөттү 7,5 жылга кыскартууну сураган. Өз кезегинде мамлекеттик айыптоочу жаза мөөнөтүн кыскартууга болорун, бирок аны 10 жыл деп белгилөө туура экенин айткан.
Соттук коллегия кеңешкенден кийин айыптоочунун сунушун канааттандырып, алгач өкүм кылынган 11 жыл алты айдын ордуна 10 жыл деп белгилеген чечим чыгарды.
