БИШКЕК, 15-янв. — Sputnik. Жалал-Абад облусунун Сузак районунун "Кум-Бел" көмүр кениндеги абал боюнча түзүлгөн ведомстволор аралык комиссиянын алдын ала жыйынтыгы чыкты. Ага ылайык, жараксыз тоо-тек үймөгүн чогултуу долбоордук чечимден ашыкча жүргүзүлүп жатканы аныкталганын өкмөттөн билдиришти.
Эскерте кетсек, Sputnik Кыргызстан маалымат агенттиги аталган кенден чыккан кир суу Зергер дарыясына кошулуп, Оштогу Өзгөн районуна караштуу жети айыл (Токтогул, Алтыбай, Жаңы-Айыл, Кайрат, Ак-Коргон, Аюу, Зергер) таза суусуз калганын жазып чыккан. Зергер айыл өкмөтүнүн башчысы Дилмухамед Бокошев кенди иштеткен компания булак башына көмүр аралаш топурак үйө бергендиктен ушундай жагдай жаралганын айткан.
"Кен казууда чыккан үйүндүлөр бульдозердин жардамы менен тоо бооруна чогултулган. Жогоруда жайгашкан булак суусу үймөктөлгөн тоо теги аркылуу агып өткөндүктөн майда урандылар жана көмүрдүн чаңына булганган. Кенди иштеткен "Цзинь Лун" ЖЧК өкүлдөрү менен жергиликтүү тургундар жолугуп, аталган компания калкты ичүүчү таза суу менен камсыздоо үчүн ыктыярдуу түрдө скважиналарды казуу милдеттенмесин алышты", — деп жазылат маалыматта.
Ошондой эле төрт жерден анализ үчүн суунун үлгүсү алынган. Мындан сырткары, айлана-чөйрөгө келтирилген зыяндын көлөмү эсептелүүдө.
Белгилей кетсек, буга чейин пландык текшерүү учурунда "Эркебек" ЖЧКсына жер кыртышын бузгандыгы үчүн 362 миң сом айып пул салынган.
"Ведомстволор аралык жумушчу комиссиянын ишинин жыйынтыгы боюнча "Кум-Бел" көмүр кенинин мындан аркы ишмердүүлүгү боюнча тийиштүү сунуштар киргизилет. Ошондой эле "Цзинь Лун" жана "Эркебек" ЖЧКларына карата жаратылышты коргоо мыйзамдарын бузгандыгы үчүн чара колдонулуп, ал эми Экотехинспекциянын кызматкерлерине өз милдеттерин так аткарбагандыгы үчүн тартиптик мүнөздөгү жаза берилет", — деп билдиришти өкмөттөн.
Суу үлгүлөрү лабораториялык изилдөөдөн өтүп, текшерүүнүн жыйынтыгына жараша тиешелүү чаралар көрүлөт.
