БИШКЕК, 5-июн. — Sputnik. Тажикстандын Улуттук коопсуздук мамлекеттик комитетинин Чек ара аскери кыргыз-тажик чек арасындагы жаңжал боюнча үн катып, өз версиясын билдирди. Бул туурасында Sputnik Тажикстан агенттиги жазып чыкты.
Ага ылайык, Тажикстан чек арадагы жаңжал тууралуу Кыргызстандын билдирүүсүн толугу менен четке кагат.
"Тажик тарап кечээги окуя боюнча чек арадагы кырдаалды курчутуп албоо үчүн билдирүү таратуудан карманган. Тилекке каршы, кыргызстандык кесиптештердин маалымат кызматы улам-улам туура эмес кабар таратып, окурмандардын башын айландырууга аракет кылышы бизди таң калтырууда. Кыргыз тараптан жарыяланып жаткан видеолордон окуя алдын ала пландалганын жана Кыргызстандын чек арачылары жаңжалды биринчи баштаганын байкоого болот", — деп жазылат маалыматта.
Мындан сырткары, окуя болгон жерге Кыргызстандын тийиштүү өкүлдөрү тажикстандык кесиптештери менен жолугууга көпкө күттүрүп кечигип келгенин белгилешет.
"Жаңжал учурунда кармалган тажик чек арачылары мекенине кайтарылды. Кармоо учурунда кыргыз чек арачылары алардын денесине катуу зыян келтирүү менен буга чейин макулдашылган эки тараптуу келишимди бузушту", — деп айтылат расмий билдирүүдө.
Ошондой эле Тажикстан аталган окуя боюнча кызматтык териштирүү баштаганын, кыргыз тарап биргеликте териштирүү жүргүзүүдөн баш тартканын айткан.
Ал эми Максат айылынын башчысы Сапарали Адинаевдин айтымында, Кыргызстандын аймагына 20га чукул тажик жоокерлери кирип келип, жаңы ачылган базарды жабуу талабын койгон. Эл буга каршылык көрсөткөндүктөн жаңжал чыгып кеткен.
