БИШКЕК, 17-апр. — Sputnik. Бишкекте жеңил унаа менен маршрутканын кыгылышуусунан жети адам жаракат алганын Sputnik Кыргызстан агенттигине Саламаттык сактоо министрлигинен айтышты.
16 Чын Куран 2017, 19:20
Белгилей кетсек, кечээ саат 18.00дөр чамасында Байтик баатыр менен Горький көчөлөрүнүн кесилишинде эл ташыган Mercedes Benz Sprinter менен Toyota Camry үлгүсүндөгү унаа кагышып, капталына кулаган маршруттук такси бир топко чейин сүрүлүп барган. Күбөлөрдүн айтымында, маршрутканын ичинде 15 адам болгон.
Билдирмеге ылайык, бул жол кырсыгынан жети адам жаракат алып, анын бири жаш бала болгон. 14 жаштагы өспүрүм шаардык балдар клиникалык ооруканасына жеткирилип, анын баш мээси чайкалганы аныкталган.
Ал эми Травмотология жана ортопедия илим изилдөө борборуна алты адам кайрылып, алардын төртөө амбулатордук негизде дарылана турган болсо, экөө ооруканага жаткырылган. Бирөөнүн колу сынып, экинчиси билегинен жараат алган. Маалыматта экөөнүн тең абалы туруктуу экени айтылат.
