БИШКЕК, 2-апр. — Sputnik. Садыр Жапаров учурда жаткырылган №47 түзөтүү колониясынын ооруканасынын фельдшери экс-депутатты карап чыгып, кекиртеги сол жагынан жана сол колунун кан тамырлары кесилгенин аныктап чыкты. Бул туурасында ЖАМКтын маалымат кызматынан билдиришти.
Бүгүн Садыр Жапаров колунун кан тамырларын нандын бычагы менен кескилеп, ооруканага түшкөнү белгилүү болгон.
"Таңкы саат беште экс-депутаттын камерасына №1 СИЗОнун дарыгерлери чакырылган. Күзөттөгү фельдшер карап, кекиртеги сол жагынан жана сол колунун кан тамырлары кесилгенин айткан. Ага дароо медициналык жардам көрсөтүлгөн. Өзү кескендиги тууралуу факты журналга катталды. 07.00дө Жапаровго операция жасалды. Учурда ал хирургия бөлүмүндө өзүнчө палатада жатат", — деп айтылат билдирүүдө.
Эске саксак, 25-мартта УКМК Садыр Жапаровду камакка алган.
Экс-депутат Кылмыш жаза кодексинин 227,341, 113 жана 234-беренелери (Барымтага алуу, бийлик өкүлүнө карата зомбулук көрсөтүү, өлтүрөм деп коркутуу, бейбаштык) боюнча күнөөлөнүүдө.
Маалыматка караганда, №1 СИЗОдо атайын номур коюлган бычактар тамак-ашты кесүү үчүн колдонулат.
