БИШКЕК, 2-апр. — Sputnik. Садыр Жапаров өзү колундагы кан тамырларын нандын бычагы менен кескилегенин Sputnik Кыргызстан агенттигинин кабарчысына КРдин Жаза аткаруу мамлекеттик кызматынын маалымат катчысы Александр Никсдорф билдирди.
Бүгүн экс-депутат мурда жаткан №1 СИЗОдон колдорунун кан тамыры кескиленип, №47 түзөтүү колониясынын ооруканасына жеткирилген.
"Жапаров №1 СИЗОдо бир камерада үч адам менен отурган. Ал өзүнүн венасын өзү нан кескен бычак менен кесиптир. Эч бир криминалдык авторитеттер менен чогуу бир камерада отурган эмес, үстүнө эч ким дагы кирген жок. Бардыгы көзөмөлдөнүп турган", — деди Никсдорф.
Маалыматка караганда, учурда саясатчынын абалы канааттандыраарлык.
Эске саксак, 25-мартта УКМК Садыр Жапаровду камакка алган. Экс-депутат Кылмыш жаза кодексинин 227,341, 113 жана 234-беренелери (Барымтага алуу, бийлик өкүлүнө карата зомбулук көрсөтүү, өлтүрөм деп коркутуу, бейбаштык) боюнча күнөөлөнүүдө.
