БИШКЕК, 2-ноя. — Sputnik. Учурда валюта рыногунда абал туруктуу болгону менен долларга карата суроо-талап аз-маз жогорулап жаткандыктан, акыркы күндөрү жашыл акчанын наркы бир аз көтөрүлдү. Бул тууралуу Sputnik Кыргызстан агенттигине Улуттук банктын маалымат кызматынан билдиришти.
24-октябрдан бери Улуттук банк тарабынан аныкталган доллардын наркы 52 тыйынга көтөрүлүп 68,95 сомду түзгөнү белгилүү болгон.
"Кыргызстанда акчаны алмаштыруу курсун суроо-талапка жараша рынок аныктайт. Ошол себептүү чет өлкөлүк акчанын наркы өйдө-төмөн болуп турушу кадыресе көрүнүш. 24-октябрдан 3-ноябрга чейин доллардын сомго карата расмий курсу 0,8 пайызга өсүп, 68,43 сомдон 69,02 сомго жетти", — деп айтылат билдирүүдө.
Маалыматка караганда, бул анча чоң эмес өсүү ички сезондук факторлорго тиешелүү.
Жашыл акчанын курсу жыл башынан бери 0,3 пайызга төмөндөп, бир доллар 69,23 сомдон 69,02 сомго түштү.