БИШКЕК, 28-апр. — Sputnik. Бишкек — "Манас" аэропорту жолу бир жыл мурун "Технотоп" компаниясы тарабынан асфальтталган. Ага мамлекеттик бюджет менен капиталдык салымдардан 954 миллион сом бөлүнгөн. Бирок бул убакыт аралыгында жаңы жолдон кемтик табылып, экинчи ирет оңдолуп жатат.
Бирок бул убакыт аралыгында жолду куруу иштери кынтыксыз өткөндүгүн айтуу кыйын. Тагыраагы, өткөн жылдын август айында премьер-министр Сооронбай Жээнбеков "Манаска" кеткен жол айыл деңгээлинен төмөн жасалганын айткан.
"Башка мамлекеттин жолдору кандай жасалганын көрүп жатасыңар да. Ушинтип кантип жол салсын. Райондун айылдарында да мындай жол салынган жок. Мындай болбойт да. Баарын тең оңдогула. Кабыл албагыла, уят эмеспи", — деп өкмөт башчы жол кургандарды уяткарган.
Мамлекеттин акчасына жасалып жаткан жолдун сапатсыз курулушунан улам ошол убактагы транспорт жана жолдор министри Замирбек Айдаровго сөгүш жарыяланган.
Ушул эле жолдо үстүбүздөгү жыл ичинде кайрадан жыртыктар пайда болуп, учурда оңдоо иштери жүрүп жатат.
Транспорт жана жолдор министрлигинин маалымат кызматы кемтик жолдун 27-чакырымында кеткенин Sputnik Кыргызстан агенттигине ырастады.
"Бишкек — "Манас" аэропортуна кеткен жолдун 27-чакырымында жарака кеткен. Буга мурдагы кыртыштын үстүнө асфальт төшөлүп калганы себеп. Жолго бир жылдык кепилдик берилгенине байланыштуу оңдоо иштерине кеткен чыгымды башкы подрядчик "Технотоп" компаниясы көтөрөт", — деп маалымат кызматынан билдиришти.
Ал эми "Технотоп" компаниясынын жетекчиси Евгений Тимошенко ден соолугуна байланыштуу көтөрүлгөн маселеге кийинки жумада жооп берерин айтты.
