БИШКЕК, 17-окт. — Sputnik. Дүйнөлүк жалпыга маалымдоо каражаттары Кыргызстанда жекшемби күнү өткөн президенттик шайлоонун жүрүшү жана КСДПдан көрсөтүлгөн талапкер Сооронбай Жээнбековдун алдын ала маалыматтар боюнча алдыга озушу тууралуу талкуулап жатышат. Айрым басылмалар шайлоонун жыйынтыгын жана бийликтин демократиялык жол менен берилишин негизинен автократтар башкарып келген аймак үчүн өзгөчө жана жаңы нерсе катары баалашууда.
Алдыңкы агенттиктердин бири Bloomberg өлкө жалпы регионго президенттик кресло үчүн ат салышууну ачык атаандаштыкта өткөрүүгө болорун далилдеди деп белгиледи.
"Негизинен автократтар башкарып келген аймак үчүн Кыргызстан таптакыр башкача нерсени ишке ашырууда", — деп жазат басылма.
Ал эми германиялык Deutsche Welle телерадиокомпаниясы мөөнөтү аяктап бара жаткан президенттин бийликти тынчтык жолу менен өткөрүп берүү чечимин жогору баалаган.
"Ачык-айкын шайлоо өткөрүүнү убадалаган Атамбаев мурунку СССРдин жаңы тарыхында өз ыктыяры менен кызматынан баш тарткан алгачкы лидер болуп калды", — деп билдирди аталган компания.
Шайлоо экинчи тур менен аяктай турганын божомолдоп жаткан британиялык Reuters агенттиги Жээнбековдун алдыга озушун башкача кабыл алды.
"Россияга ыктаган лидердин мураскери экинчи тур болот деген божомолдорго карабай жекшемби күнү эле жеңишке ишеними чоң экенин айткан", — деп жазат Reuters.
Аталган агенттик мындан ары Бабановдун жасай турган кадамдарына да дыкат көз сала турганын кошумчалаган.
