БИШКЕК, 28-июн. — Sputnik. Нарын облусунун Ат-Башы районунда VII шырдак фестивалы башталып, ага өлкөнүн ар кайсы жеринен уздар өз эмгектерин алып келишти. Бул тууралуу Sputnik Кыргызстан агенттигинин кабарчысына район акиминин орун басары Ажар Дүйшөналиева билдирди.
Фестивалдын алкагында "Мыкты шырдак", "Мурас шырдак" номинацияларына мыкты эмгектер тандалат. Ошондой эле тамак-аш, узун чачтуу уз кыздар, мектеп окуучуларынын кол өнөрчүлүгү, эко-мектеп, уютулган кийимдер жана этно буюмдардын арасында сынактар өтүп, масстер-класстар көрсөтүлөт.
"Фестивалдын максаты — улуттук буюмдардын сап башында турган шырдакты даңазалоо, жайылтуу жана сатууну жогорку деңгээлде уюштуруу. Шырдак фестивалына тандалган кол эмгектер алып келинген. Бул жердеги бардык шырдактар кой жүнүнөн, бардык эрежелер сакталып жасалган. Эколгиялык жактан таза буюм болуп саналат", — деди Дүйшөналиева.
Анын айтымында, быйыл жөн гана оюу-чиймелер эмес, Манас бабабыздын, тарыхый жайлардын жана жаныбарлардын сүрөттөрү түшүрүлгөн өзгөчө шырдактар да алып келинди.
