БИШКЕК, 27-мар. — Sputnik. Дизайнер Жетиген Такенов Бишкек шаарындагы кооз имараттардын сүрөтүн сонун кылып шөкөттөп, аны Instagram баракчасынан бөлүшкөн.
Такенов Бишкектеги тарыхый жана архитектуралык мааниси чоң болгон имараттарды иллюстрациялаган. Ал бир сүрөттү тартууга 2-3 жума кетерин кошумчалады.
"Кечкисин Бишкекти аралай басып, анын кооздугун көргөндө мольбертти алып, сүрөт тарткың келет. Сулуулук бул түгөнбөгөн энергия, бирок аны биз күнүмдүк турмуш менен алпурушуп жүрүп байкабай калабыз", — деди дизайнер.
Ал Мамлекеттик тарых музейин, Улуттук опера жана балет театрын, Кыргызстандын эл аралык университетинин имараттарын тарткан. Дизейнер өз эмгектеринде аталган жерлерди башкача өңүттөн көрсөтүп берген.
Такенов бош убактысы боло калганда сүйүктүү иши менен алектенерин айтат. Социалдык тармактарга жарыялаган сүрөттөрдү ал төрт айдын ичинде тарткан.
Жаш дизайнер Жетиген Такенов Кыргыз-Түрк "Манас" университетин аяктаган. Учурда дизейн компаниясында арт-директор болуп эмгектенет.
