ДУБАЙ, 24-фев. — Sputnik. Бириккен Араб Эмирлигинде өтүп жаткан "Fashunity exhibition 2017" аттуу эл аралык фестивалдын меймандары кыргыз павильонундагы сары май, чучук, куруттун даамын татып, суктанганын билдиришти. Бул туурасында иш-чарага күбө болгон журналист Айнагүл Сапарбек кызы Дубай шаарынан кабарлады.
Иш-чарага катышкан мекендештер 20дан ашуун мамлекет арасында Кыргызстанды таанытып жаткандыгын КРдин Бириккен Араб Эмирлигиндеги (БАЭ) Башкы консулунун милдетин аткаруучу Мээрим Аскарова билдирген.
"Бул иш-чарада Кыргызстан соңку эки жылдан бери өз аянтчасын уюштуруп келет. КМШ ичинен Украина, Казакстан, Азербайжандын катарында биздин өлкө дагы өз маданиятын таанытууда. БАЭдеги кыргыздардын ынтымагы бекем, жарандарыбыз абдан активдүү. Бул иш-чарага да ар бири колунан келген кошумчасын кошуп, бирдиктүү иш жарата алышты", — деди Аскарова.
Быйылкы фестивалда кыргыз павильонун уюштургандардын бири активист Хадижа (Кыял Өскөнбаева) өткөн жылы да катышкан.
Хадижанын айтымында, келгендер павильонго да баш багып, даам сызып, улуттук кийим кийинген кыздарыбызга суктанып, улам сүрөткө түшүүнү суранып жатышат. Алар суктануусун да жашырган эмес.
Хадижа иш-чаранын меймандарына өлкөбүз тууралуу баяндап, төрт мезгилдүү туризм шарты бар Кыргызстанга аларды келип кетүүгө чакырды.
Фестиваль Мухаммед бин Рашид атындагы Ислам маданият борбору тарабынан өткөрүлүп, ар бир өлкөгө өз маданиятын, туризм жагын таанытууга ыңгайлуу аянтча түзүп берет. Ушундай эле нуктагы иш-чара келерки айда, Нооруз майрамына карата уюштурулат.
Ал эми бул иш-чара эртең, 25-февраль күнү жыйынтыкталмакчы.
Консулдуктун расмий маалыматы боюнча, БАЭде Кыргызстандын 3000ге чукул жараны жашайт.
