БИШКЕК, 30-апр. — Sputnik. Санариптик өнүктүрүү жана инновациялык технологиялар министрлиги жоюлуп, президенттин иш башкармалыгынын курамына кирди. Тиешелүү жарлыкка өлкө башчы Садыр Жапаров кол койгонун маалымат кызматы билдирди.
Жарлыкка ылайык, министрликтин бардык функциялары, штаттык саны, ресурстары жана ведомстволук түзүмдөрү иш башкармалыкка өттү. Мындан ары санариптештирүү, санариптик башкаруу, киберкоопсуздук, жасалма интеллект жана байланыш тармагындагы мамлекеттик саясатты иштеп чыгуу жана ишке ашыруу милдетин президенттин иш башкармалыгы аркалайт.
Ошондой эле мамлекеттик органдардагы санариптик өнүктүрүү боюнча орун басарлардын кызматтары кыскартылары белгиленди (Ички иштер министрлигинен тышкары).
Жарлык санариптик трансформацияны тездетүү, мамлекеттик кызмат көрсөтүүлөрдү жакшыртуу жана өлкөнүн IT-инфраструктурасын өнүктүрүүгө багытталганы кошумчаланды.