БИШКЕК, 10-апр. — Sputnik. Талас шаарында 14 жыл бою иштебей эле айлык алып жүргөн жаран аныкталып, ал мамлекетке дээрлик 1,5 миллион сом зыян келтирген деп шектелүүдө.
УКМКнын маалымат кызматы билдиргендей, ал 2012-жылы Талас медициналык колледжине жумушка кабыл алынган, бирок ишке киргенден бери өзүнүн кызматтык милдеттерин аткарган эмес. Бул аралыкта жасалма толтурулган табелдеринин негизинде ага маяна үзгүлтүксүз төлөнүп келген.
Бул факт боюнча Кылмыш-жаза кодексинин 210-беренеси ("Ишенип берилген мүлктү ыйгарып алуу же коротуу") менен иш козголгон. Текшерүүнүн жыйынтыгында мамлекетке келтирилген зыяндын көлөмү 1 миллион 492 миң 335 сомду түзгөнү аныкталды. Учурда тергөө уланууда.