Маданият, маалымат, спорт жана жаштар саясаты министрлиги "Эркин Европа/Азаттык" радиосунун кыргыз кызматына катуу эскертүү бергенин президенттин маалымат катчысы Аскат Алагөзов билдирди. Ал жазгандай, министрлик мындай чечимге аталган медианын мамлекет башчы Садыр Жапаровго шайлоо өнөктүгү учурунда маркум Евгений Пригожиндин жакын адамдары жардам берген деген чындыкка дал келбеген маалыматтарды таркатуусунан улам келген. "Эгерде бул материал "Азаттыктын" Кыргызстандын жогорку жетекчилигин атайын каралоого багытталган редакциялык саясатынын бир бөлүгү болсо, анда күн тартибине ушундай медиа бизге керекпи деген маселе чыгышы мүмкүн", — деп жазган Алагөзов социалдык тармактагы баракчасына. Алагөзов дүйнөлүк аудиториясы бар "Азаттык" радиосунун ушак-айың деңгээлиндеги маалыматтарды жайылтуусун өкүнүү менен белгилеп, бул ал жакта эмгектенген кызматкерлердин кесипкөйлүгүнө көлөкө түшүрөт деп эсептээрин жазган.
Акыркы маалыматтарга караганда, жыл ичинде зордук-зомбулук боюнча 11 миңге жакын арыз келип түшкөн. Бул тууралуу Акыйкатчы Жамиля Жаманбаева Sputnik Кыргызстан радиосуна маек куруп жатып билдирди. Анын айтымында зордук-зомбулукка кабылгандар алгач укук коргоо органдарына арызданып, андан жыйынтык чыкпаганда гана омбудсменге кайрылышат.Мунун менен катар ал, акыркы кезде Акыйкатчы институтунун коомдогу орду, иши бир топ жогорулаганы байкалганын белгиледи.Ал Омбудсмен институтунун адам укуктары тууралуу сунушуна, катына тийиштүү жооп бербеген мамлекеттик органдарды жылдык баяндамага да жазышарын кошумчалады.
Sputnik агенттигине окурмандар кайрылып, бир жума мурда бир килограмм эттин баасы 530 сом болсо, азыр сулп эт 700 сомго чейин жетип жатканын кабарлашты. Базардагы сатуучулар мындай көрүнүш Өзбекстанга экспорт күчөгөндүктөн болуп жатканы менен түшүндүрүштү. Монополияга каршы жөнгө салуу кызматы эт кымбаттаганын тастыктады. Ага ылайык азыр уйдун эти 547 сом болууда, ал эми былтыр 510 сомду түзгөн. Бул 5,2 пайызга кымбаттаганын билдирет. Монополияга каршы жөнгө салуу кызматы баанын көтөрүлүшүнө бир нече себептерди атады. Ага ылайык, бордоп семиртилген малдын аз болушу, башка продукцияларга жана кызмат көрсөтүүлөргө болгон баанын өсүшү, элдин кирешесинин көбөйгөндүгү баанын көтөрүлүшүнө себеп болгон. "Учурда эттин баасын мамлекеттик жөнгө салууга эч кандай негиз жок", — деп айтылат маалыматта. Ал эми Айыл чарба министрлиги баанын олуттуу өсүшү күтүлбостүгүн жана кооптонууга негиз жок экендигин билдирди.
Өкүлдөр палатасынын эл аралык иштер боюнча комитетинин төрагасы Майкл Маккол мамлекеттик катчы Энтони Блинкенди АКШ аскерлеринин Афганстандан чыгарылып кетиши боюнча көрсөтмө берүүгө чакырды. Бул туурасында РИА Новости Fox News телеканалына шилтеме кылып жазды. Телеканал Блинкен мурдараак комитеттин алдына баруудан баш тартканын кошумчалаган. Блинкен 19-сентябрда комитетке барышы керек, болбосо мыйзамчылар аны Конгрессти сыйлабайт деп күнөөлөшү мүмкүн. Мамлекеттик департаменттен Блинкендин башка иштери болгондуктан аталган күн ылайыксыз болорун айтышып, башка учурду сунушташкан. 2021-жылдын 31-августунда америкалык аскерлер Кабул аба майданынан чыгып кеткен.