Банк секторуна санарип инфратүзүмдүн потенциалын өстүрүүнү, инновациялык өнүмдөрдү кеңири колдонууну, туруктуу каржылоо принциптерин жана жашыл экономиканы ишке киргизүүнү тездетүү зарыл. Бул тууралуу президент Садыр Жапаровдун Банк кызматкерлеринин күнүнө карата куттуктоосунда айтылат. Мамлекет башчы банк кызматкерлеринин кесиптик майрамы өз алдынча экономикалык саясат жүргүзүүгө негиз салган, эгемен Кыргызстан үчүн тарыхый окуя саналган улуттук валюта — кыргыз сомунун жүгүртүүгө киргизилиши менен түздөн-түз байланышта экенин белгилегенБүтүндөй өлкөнүн экономика тармагы, анын акча-кредиттик саясаты банк кызматкерлеринин натыйжалуу ишине байланыштуу экенин айткан президент сөзүнүн соңунда бекем ден соолук, үй-бүлөлүк бакыт-таалай каалаган.
Малайзиянын премьер-министри Анвар Ибрагим 15-16-майда расмий сапар менен Кыргызстанга келет. Бул тууралуу президенттик администрациянын тышкы саясат бөлүмүнүн башчысы Муратбек Азымбакиев билдирди.Маалыматка ылайык, Анвар Ибрагим Борбордук Азия боюнча сапарынын алкагында Кыргызстанда болот.Өлкөдө ал жогорку жана бийик деңгээлдеги жолугушууларды өткөрөт. Кыргызстан менен Малайзиянын ортосундагы саясий, соода-экономикалык жана маданий-гуманитардык алаканы жакшыртуу талкууланары белгиленди.
Өткөн жылы банк сектору 107,4 миллиард сом киреше таап, өсүш 16 пайызды түздү. Бул тууралуу Улуттук статистика комитетинин маалыматында айтылат.Белгиленгендей, жыл сайын 10-майда банк кызматкерлери кесиптик майрамын белгилешет. Банк сектору экономиканын ажырагыс бөлүгү болуп, экономиканын өсүшүнө жана туруктуулугуна чоң салым кошот.Экономиканын банк секторунун суммардык активдери бир жылдын ичинде дээрлик 21 пайызга көбөйүп, 2023-жылдын аягына карата 1 триллион 58,8 миллиард сомду түздү. Активдердин наркынын 58 пайызга жакыны коммерциялык банктарга, 42 пайызы Улуттук банкка туура келет.
Кыргызстандын акыйкатчысы Жамиля Жаманбаева мамлекеттик органдарды аскер кызматкерлеринин укуктарын сактоого чакырды.Акыйкатчынын маалымат кызматы билдиргендей, аскерге чакырылган катардагы жоокерлердин жана офицерлердин укуктарын коргоо маселеси курч бойдон калууда. Алардын укуктарын камсыздоо жана ден соолугун сактоо үчүн тез арада чара көрүү талап кылынат.Укук коргоочулар Коргоо министрлигинин аскердик госпиталына мониторинг жүргүзүшкөн. 2024-жылдын 1-январынан 26-мартына чейин жалпы 607 киши кайрылган. Алардын 139у — катардагы жоокерлер.Мониторинг учурунда аскерге чакырылган жоокерлердин госпиталга келип жатышынын бирден-бир себеби медициналык комиссия учурунда өнөкөт же башка оорулары аныкталбай, машыгууда илдеттери курчуп кетип жатканы белгилүү болгон.
Өлкөдө жарым жылга жумуртканын импортуна тыюу салуу сунушталууда. Тиешелүү токтом долбоорун Суу ресурстары, айыл чарба жана кайра иштетүү өнөр жайы министрлиги коомдук талкууга койду.Мындай чечимди жергиликтүү ишкерлердин кайрылуусунан кийин кабыл алуу каралган. Алар ички муктаждыкты толук камсыздай турганына ынандырышууда. Максаты азык-түлүк коопсуздугун камсыз кылуу, бааны турукташтыруу жана жергиликтүү өндүрүүчүлөрдү колдоо экени айтылган."Кыргызстанда ири жана үй-бүлөлүк майда чарбаларда жумуртка өндүрүлөт. Бул сектор өлкөнүн айыл чарбасынын олуттуу үлүшүн түзүп, көптөгөн айыл тургундары үчүн кирешенин маанилүү булагы болуп саналат", — деп жазылган документтин негиздемесинде.