БИШКЕК, 11-мар. — Sputnik. Кыргызстандагы Акушер-гинеколог жана неонатологдор ассоциациясынын президенти, профессор Арсен Аскеров эрозияны кайсы учурда күйгүзүү керектигин Sputnik Кыргызстан агенттигине берген маегинде билдирди.
Анын айтымында, эктопиянын эки түрү болот. Зыянсыз түрү эрозия деп аталып, ал өспүрүм кезден төрөгөн мезгилге чейин жүрө бериши мүмкүн. Дарыгер эгер аялдын иммундук системасы жакшы, козгоочу вирустар жок болсо эрозияны күйгүзүүнүн кереги жок экенин белгилеген.
"Ал эми эктопиянын жаман түрүн ( дисплазия) кольпоскопиянын жардамы менен текшерип, кестирип алып салуу абзел. Мурда гинекологдор дароо онкологдорго жиберип, ракка чейинки эктопияны деле толук алып салышчу. Азыр илимдин жетишкендиги менен эктопиянын ракка чейинки жаман түрүн (дисплазия) тереңдигине, өлчөмүнө жараша күйгүзүп коюшат. Мында вирус өлөт да, жаңы клеткалар анын ордун жаба баштайт. Көпчүлүк учурда ракка жеткирбей дарыласа болот" , — деген медик.
Ал кыз-келиндерди убагында медиктерге кайрылып, текшерилип турууга чакырган. Гинекологдун маегин толугу менен Sputnik Кыргызстан агенттигинен окуй аласыздар.