БИШКЕК, 7-мар. — Sputnik. Пенсия чегерилбей Эмгек, социалдык камсыздоо жана миграция министрлиги аркылуу 3 000 сомдон жөлөк пул алып жүргөн 121 баатыр эненин акчасына 5000 сомдон кошулушу мүмкүн. Бул боюнча Жогорку Кеңеш токтом кабыл алып, министрлер кабинетине жөнөттү.
Долбоорду депутат Камила Талиева иштеп чыккан. Анын айтымында, учурда жети жана андан көп баласы бар мындай энелер пенсияга чыкканда кошумча 1000 сом гана сый акы берилет.
"Норма 2011-жылы кабыл алынган экен. Андан бери инфиляция болуп, акчанын куну кетти. 1000 сом эч нерсеге жарабай калды. Ошондуктан өкмөткө 5000 сомдон кошуп берүүнү сунуштап жатабыз. Алар бюджетке карап чечим чыгарып беришет", — деди Талиева.
Демилгечилердин бири Марлен Маматалиевдин айтымында, демилге күчүнө кирсе, ага жылына 3 миллион сом керектелет. Ал эми Социалдык фонддун каттоосунда 33 миң баатыр эне бар. Алар кошулганда 2 миллиард сом кошумча караларын белгиледи.
“Өкмөт жок дегенде соцпособие алган 121 баатыр энеге каражат бөлүп бериши керек. Кантип 3 миллион сом чыкпасын”, — деди Маматалиев.