Жумабек Ибраимов 1944-жылы 1-январда Чүй облусунун Кемин районундагы Жаңы-Алыш айылында жарык дүйнөгө келген. Элетте айыл чарба техникаларынын кыймылдаткычтарын оңдогон слесардын жардамчысы болуп иштеп жүрүп, бир кесипке ээси болууну эңсейт. Жаш жигит Фрунзедеги политехникалык институтка тапшырып, аны ийгиликтүү аяктаган соң мугалимдикти аркалаган. Кийин Москвадагы курулуш институтунда тажрыйба топтоп келип, Фрунзе атындагы айыл чарба техникасын куруу заводунда инженер, Балыкчыдагы ири ишканада инженер, 37 жашында ошол заводдун директору кызматына дайындалат.
1985-жылы Балыкчы шаардык элдик көзөмөл комитетинин төрагасы, Коммунисттик партиянын ошол калаадагы биринчи катчысы болот. Үч жылдан кийин өлкөнүн компартиясынын уюштуруу иштери бөлүмүнүн башчысынын биринчи орун басары, Чүй облустук компартиянын экинчи катчысы болуп дайындалып бир катар кызматтык тепкичтерди басып өткөн. Эгемендүүлүк жылдары Жогорку Кеңештин эки жолку депутаты болуп шайланат. Иш билги инсан 90-жылдары ошол кездеги президенттин сунушу менен Бишкектин мэри, мамлекеттик катчы, мамлекет башчысынын кеңешчиси болуп жүрүп премьер-министрликке чейин жеткен. Мамлекеттик ишмер 1999-жылы 55 жашында онкологиялык оорудан улам дүйнөдөн кайткан.
Тема боюнча: