БИШКЕК, 30-ноя. — Sputnik. Депутат, бизнесмен, аткаминер, акчалууларга интим кызматтарын көрсөткөн 200дөй элиталык сойку аныкталды. Бул тууралуу УКМК төрагасы Камчыбек Ташиев атайын кызматтын Ысык-Көл облусу боюнча Балыкчы шаардык башкармалыгынын жаңы имаратынын расмий ачылышында сүйлөп жатканда билдирген.
"Буга чейин кармалган 70 кыздын сүрөтүн чыгарганбыз. 200 кыздын сүрөтүн чыгарган жокпуз, жүзүн көрсөтпөйбүз. Алардын баары каттоого алынды. Бирок дагы бир жолу ушундай жол менен кармалса, анда коомчулукка сүрөттөрүн, аты-жөнүн жарыялоого аргасыз болобуз. Ата-энелерин чакырып, кыздары эмне кылып жатканын көрсөтөбүз. Бул кыздардын ата-энелери жакшы шартта жашайт. Алардын билим алуусуна акча төлөп жатышат, бирок ага карабай кыздары мындай жолго барышууда. Булардын кызматын депутат, аткаминер, мамлекеттик кызматкер, бизнесмен, акчалуу адамдар колдончу. Аларга да кайрылып кетемин. Кокус дагы бир жолу кылтакка илинсеңер жүзүңөрдү коомчулукка көрсөтүп, баланча депутат же баланча аткаминер ушундай жолго барды деп айтабыз", — деген Ташиев.
УКМК төрагасы Кыргызстанда бир дагы адам мындан ары өлкөдөгү кыз-келиндердин интим кызматтарын албай турганын кошумчалаган.