БИШКЕК, 2-ноя. — Sputnik. Президент Садыр Жапаров бүгүн Астана шаарына болгон иш сапарынын алкагында Түркиянын өлкө башчысы Режеп Тайип Эрдоган менен жолугушту. Бул тууралуу мамлекет башчынын маалымат кызматы кабарлады.
Өлкө лидерлери соода-экономикалык, маданий-гуманитардык, илимий-техникалык жана башка тармактарда эки тараптуу кызматташуунун актуалдуу маселелерин талкуулашкан.
Садыр Жапаров кыргыз элинин атынан Режеп Эрдоганды жана боордош түрк элин Түркия Республикасынын түзүлгөндүгүнүн 100 жылдыгы менен куттуктаган.
“Президент эки өлкөнүн стратегиялык кызматташтыгы активдүү өнүгүп жатканын баса белгиледи. Кыргызстан Түркия менен бардык тармакта кызматташтыкты тереңдетүүгө артыкчылыктуу көңүл бурууда”, - деп жазылган маалыматта.
Эрдоган өз кезегинде эки тараптуу мамилелердин өнүгүү динамикасына канааттануусун билдирип, аларды мындан ары тереңдетүүгө даярдыгын билдирген.
Тараптар соода-экономикалык кызматташтык боюнча кыргыз-түрк өкмөттөр аралык комиссиясынын кезектеги жыйынын өткөрүүнүн маанилүүлүгүн белгилешти.
Лидерлер кызматташуунун бардык артыкчылыктуу багыттары боюнча байланыштарды тереңдетүү үчүн жогорку саясий деңгээлдеги активдүү диалогду улантууну макулдашкан.