Соңку тогуз айда өлкөгө 240 чет элдик фильм алып келинип, кинотеатрларда көрсөтүлдү. Бул тууралуу Талантбек Төлөбеков Sputnik Кыргызстан радиосунун эфиринде маек куруп жатып билдирди.
Анын айтымында, алардын ичинен 21 кино Россиядан келген.
"Статистика боюнча, үстүбүздөгү жылдын январь-сентябрь айларында чет өлкөлөрдөн жалпы 240 фильм келип, чоң кинотеатрларда көрсөтүлдү. Атап айтсак, Америкадан 110, Россиядан 21 фильм келген. Калган сандарды Европалык кинолор толуктайт. Жадагалса Мексикадан да келген тасмалар элге сунушталган. Бул фильмдерден түшкөн каражаттар толугу менен өз өлкөсүнө кетет. Бизге болгону салык төлөнөт. Учурда чет элдик тасмаларды кыргызча субтитр менен көрсөткөнгө кадамдарды жасоодобуз. Кээ бирлер дароо эле дубляж кылбайсыңарбы деп жатышат. Бирок азыркы кезде биздин өлкөдө талапка жооп берген студия жок. Ооба, телеканалдар дубляж жасап жатышат. Бирок бул жерде кинотеатр менен телеканалдын айырмасын түшүнө билүү маанилүү. Бүгүнкү күндө биз жасап жаткан кичинекей кадамдар келечекте чоң жетишкендиктерге жол ачат", — деди Төлөбеков.
Ал чет элдик кинофильмдерди дубляж кылганга заманбап студиялардын пайда болушу менен жумуш орундары көбөйө турганын кошумчалады.