Кувейт мамлекетинин Vidago Art Production ("Искусствону өнүктүрүү") компаниясы Кыргызстандын тарыхы тууралуу тасма тартат. Бул тууралуу Али Аббас Аль-Наки Sputnik Кыргызстан радиосунун эфиринде маек куруп жатып билдирди.
Анын айтымында, Кыргызстан тараптагы чыгармачылык топ даяр болору менен тартуу иштери башталмакчы.
"Тасма тартуу үчүн Кыргызстанды тандап алганыбыздын себептери көп. Алардын эң башкысы — динибиздин бир экени жана Кыргызстандын бай тарыхы. Дүйнөдө болуп жаткан өзгөрүүлөргө байланыштуу мусулман элдери менен болгон мамилени бекемдегибиз келет. Кыргызстан жана Кувейт мамлекеттери ортосундагы кызматташууну арттырууну каалайбыз. Маданият, маалымат, спорт жана жаштар саясаты министрлиги менен даректүү тасма тартуу боюнча сүйлөшүүлөр болду. Эми сиздер тарап даяр болсо эле тартуу иштерине киришебиз. Бул нерсе менин колумда болсо бүгүн эле тартып баштамакмын. Анткени менде каалоо абдан күч. Тартылчу тасма аркылуу белгилүү жазуучу Чыңгыз Айтматовду араб өлкөлөрүнө тааныткыбыз келет", — деди кинопродюсер.
Ал чыгармачылык топту эки өлкөнүн кино жаратуучулары түзө турганын кошумчалады.