БИШКЕК, 23-май — Sputnik. Курманбек Бакиевден интервью алган журналист Кадыр Кошалиев өзү жазган арызынын негизинде УТРКдан кетти. Бул тууралуу аталган телеканал кабарлады.
"Улуттук телерадиокорпорациясынын 1-каналынын кабарчысы Кадыр Кошалиевдин мурдагы президент Курманбек Бакиевден алган интервьюсу коомчулукта кызуу талкуу жаратып, түрдүү пикирлердин жаралышына себеп болду. УТРКнын этика жана тартип комиссиясы атайын иликтөөлөрдү жүргүзүп жаткан. Бирок корутунду чыга электе өз каалоосу менен кызматтан кетти", — деп айтылат маалыматта.
Кабарчы аталган маекти корпорациянын жетекчилиги менен макулдашпай, өзүнүн жеке демилгеси менен тартып келгени белгиленди. Ошондой эле берүүнү эфир аркылуу көрсөтүү пландалбаганы айтылды.
23-май күнү качкын президент Курманбек Бакиевдин чуулуу маегинен улам Апрель окуясында каза болгондордун жакындары жана жабыр тарткандар митингге чыгышты. Алар Акаевди актап өлкөгө чакыруу жана Бакиевди көз көрүнөө актоо аракеттерин байкап, тынчсызданып жатканын айтышты. Бакиевден интервью алып, аны "экс" деп атоого журналист Кошалиев кимден уруксат алганына кызыгышкан.
Эске салсак, өткөн жумада УТРКнын "Кыргыз ааламы" берүүсүнүн алып баруучусу, Элдик курултайдын төрагасы Кадыр Кошалиевдин Курманбек Бакиевден алган маеги социалдык тармактарга жарыяланган. ЖК депутаттары Эльвира Сурабалдиева менен Эрулан Көкүлов Бакиевдерди реабилитациялоо жүрүп жатабы деп шек санап, президенттик администрациянын түшүндүрмө беришин талап кылышкан. Ал эми Кошалиевди жумуштан кетирүү керектигин билдиришкен. Өз кезегинде УТРК Кошалиев жетекчилик менен макулдашпай өз алдынча барып маек алганын айтып, ички териштирүү болорун убадалаган.