Уйкунун качышы ден соолукта мандем бар экенинен кабар берет. Бул тууралуу Гүласыл Сүтүева Sputnik Кыргызстан радиосунун эфиринде маек куруп жатып билдирди.
Анын айтымында, уйкусуздук — дээрлик бардык оорунун белгиси.
"Бул өтө чоң жана оор тема. Анткени уйкусуздук дээрлик бардык оорунун белгиси болуп саналат. Бир жери ооруган адам сөзсүз уйкудан калат. Денесиндеги оорудан улам бир нече күн уктабай калышы да толук мүмкүн. Узакка созулган уйкусуздук психикалык ооруга да айланып кетиши ыктымал. Уйкунун кадырын ден соолугу начар адамдар көбүрөөк билет. Жаңы төрөлгөн баланын ден соолугу таза болсо суткасына 21-22 саат уктайт. Калган убактысы ойгонуп, курсак тойгузганга жана жалаяк алмаштырганга кетет. Анан бара-бара уйку убактысы азая баштайт. Өспүрүм кезде эмне үчүн дээрлик бардык улан-кыздар уктаганды жакшы көрөт? Анткени алардын көбүнүн ден соолугу таза болот", — деди Сүтүева.
Ал адам бир канча күн уктабай жүргөндө сөзүнөн жаңылып баштай турганын кошумчалады.