Бул тууралуу Нурбек Талантбеков Sputnik Кыргызстан радиосунун "Көөнө сөз" рубрикасында билдирди.
"Эпосто "караан салуу" деген сөз кездешет. Аны кара нерсени салуу, караңгы киргизүү деп түшүнбөш керек. Анын мааниси түйшүк, бүлүк салуу, алааматты, апаатты башына үйүү дегендик.
"Манаста":
"Төбөсүнөн басалы,
Төрт түлүгүн чачалы,
Төшүнө кудук казалы.
Кырдан тийип бээсин,
Кыркалай чаап кээсин,
Көргөзөлү көзүнө,
Капкайдагы ээсин.
Караан салып калкына,
Атпай журттун жалпыңа" деген саптар кездешет. Бул жерде "караан салуу" сөзү азапка батыруу маанисинде айтылууда", — деди Талантбеков.
Ошондой эле манасчы күндөлүк турмушта кайталанма сөздөрдү колдоно бербестен, ушул сыяктуу көөнө сөздөрдү колдонуу менен тилди байытуу зарылдыгын кошумчалады.