БИШКЕК, 3-авг. — Sputnik. Балыкчы шаарынын "Эдельвейс" аскер полигонунда ЖККУнун "Кобальт — 2022" биргелешкен тактикалык машыгуусу башталды. Бул туурасында Ички иштер министрлиги билдирди.
Машыгуунун ачылышында ички иштер министринин орун басары Октябрь Урмамбетов иш-чаранын негизги максаты ЖККУга мүчө-мамлекеттердеги кылмыштуулук менен күрөшүүдө күч түзүмдөрүнүн тыгыз кызматташтыгын бекемдөө болуп саналарын белгиледи.
Мындай машыгуулар ЖККУга кирген өлкөлөрдүн аймактарында тажрыйба алмашуу максатында уюштурулуп келет. Ага Армения, Беларусь, Казакстан, Тажикстан жана Россиянын өкүлдөрү катышууда.
"Эдельвейс" полигонундагы машыгуу 5-августка чейин созулат. Анын жүрүшүндө атайын багыттагы күчтөр, "бандиттик, террордук топторду издөө, бөгөт коюу, зыянсыздандыруу, ошондой эле баңгизатты мыйзамсыз алып өтүү каналдарын бөгөттөө жана сактоочу жайларды, лабораторияларды табуу боюнча окуу-практикалык жана ыкчам-күжүрмөн тапшырмаларды аткарышат.