БИШКЕК, 25-июл. — Sputnik. Запорожье облусунун макамы боюнча референдум сентябрдын биринчи жарымында өткөрүлүшү мүмкүн. Бул тууралуу облустук администрациянын башкы кеңешинин мүчөсү Владимир Рогов РИА Новости агенттигине билдирди.
Буга чейин Херсон жана Запорожье облустарынын администрациялары аймакта шайлоо жана Россия Федерациясына кирүү маселеси боюнча комиссия түзүлгөнүн жарыялашкан. Эми эки облустун тең жетекчиликтери референдум 2022-жылдын күзүндө болорун маалымдашты.
"Референдум сентябрдын биринчи жарымында болушу мүмкүн. Бирок азырынча так датасын айта албайм. Шайлоо комиссиялары түзүлүп жатат", — деди Рогов.
Ал кошумчалагандай, учурдагы эң орчундуу маселелердин бири — шайлоочулардын тизмелерин тактоо. Анткени акыркы айларда аймактан бир топ тургундар чыгып кеткен. Бирок жашоочулар Запорожье облусуна акырындык менен кайтып жатышат.
Атайын операциянын жүрүшүндө Россия аскерлери Херсон жана Запорожье облустарынын Азов бөлүгүн көзөмөлгө алган. Эки аймакта тең жаңы администрациялар түзүлүп, россиялык телеканалдар, радиолор эфирге чыгып, Крым менен соода алакалары калыбына келүүдө. Аймактар Россиянын составына кирүү планын жарыялашкан.