БИШКЕК, 12-июл. — Sputnik. Эмгек, социалдык камсыздоо жана миграция министрлиги Кыргызстандын 92 жаранын Түштүк Кореяга иштөө үчүн жөнөткөнүн кабарлады.
Жумушка жөнөп жаткандар менен кечээ, 11-июль күнү, министр Кудайберген Базарбаев жолуккан. Ал мындай мыйзамдуу ишке орноштуруу президент Садыр Жапаровдун "Миграциялык абалды жакшыртууга багытталган чараларды көрүү жөнүндө" жарлыгынын негизинде ишке ашып жатканын белгиледи.
"Кезинде Түштүк Кореянын жарандары өнүккөн өлкөлөргө чыгып, кайтып келгенден кийин мамлекетин ошолордун катарына кошууга салым кошушкан. Экинчи дүйнөлүк согуштан кийин Түркия жарандарын Германияга жөнөтүп, кайра кайткандан кийин ал адистер азыркы Түркияны курган. Бүгүнкү күндө министрликтин Япония, Улуу Британия менен макулдашуусу бар, жакында Германия менен келишим түзүлөт. Санкт-Петербург менен сүйлөшүүлөр жүрүп жатат", — деди Базарбаев.
15 жылдын ичинде министрликтин алдындагы Жарандарды чет өлкөдө ишке орноштуруу борбору Корея Республикасынын аймагында 5 000 кыргызстандыкты жумуш менен камсыздаганы айтылды. Ушу күндө EPS программасы менен аталган мамлекетте иштеп жаткан 2000дей мекендештин басымдуу бөлүгү азык-түлүк, кагаз өнөр жайында эмгектенери белгилүү болду.
Айлык акы 1 800 доллардын чегинде, тамак-ашы, жаткан жери иш берүүчүнүн эсебинен. Программанын талабы боюнча иштей турган адам корей тилин жакшы билиши керек. 2022-жылы тил боюнча тестке 1500 адам катышып, анын 360ы сынактан ийгиликтүү өткөн.