БИШКЕК, 13-июн. — Sputnik. Кыргызстанда негизги азык-түлүккө болгон баа кескин өсүп кетиши күтүлгөн жок. Бул тууралуу айыл чарба министри Аскарбек Жаныбеков билдирди.
Ал Sputnik Кыргызстан агенттигинде өткөн "Айыл чарба министрлиги азык-түлүк коопсуздугу, ирригация жана жазгы-күзгү сугаруу иштери жөнүндө" аттуу брифингге катышты.
Журналист министрге "азык-түлүк тартыштыгынын жаралбашына жана баалардын кармалып турушуна кепилдик бере аласызбы?" деген суроо узатты.
"Биз былтыр деле баа менен товардын жеткиликтүүлүгү боюнча катуу өзгөрүүлөр болбой турганына кепилдик бергенбиз. Убадага турдук. Чоң дефицит жаралып, баалар кескин өсүп кеткен жок. Бирок Кыргызстан башкалардан өзүнчө, бөлүнүп жашай албайт. Бизге тышкы рыноктогу абал таасир этет. Республикадагы баалар өлкө тышындагы көрсөткүчтөргө ылайык бекитилет. Ошентсе дагы Кыргызстанда коңшу Казакстан, Тажикстан жана Өзбекстанга салыштырмалуу ун, кумшекер жана май арзаныраак", — деди ал.
Министрдин айтымында, быйыл Кыргызстанда буудайдын түшүмү 2021-жылга караганда жакшы болот.
"Эгер ички керектөөнү канааттандыруу үчүн бизге 765-769 тонна буудай керек болсо, быйыл 665 тонна түшүм алабыз деп пландап жатабыз. Мындан тышкары, картошканын түшүмүнүн көлөмү дагы жогору болот. Май берген өсүмдүктөрдүн аянты дагы көбөйдү", — деди министр.
Журналист "демек, баалар кескин өсүп кетпейт экен да?" деп тактоочу суроо узатты.
"Менин оюм боюнча андай болбойт. Бул кумшекерге дагы тиешелүү. Буга чейин ажиотаж болду эле, бирок биз абалды турукташтыра алдык", — деди Жаныбеков.
Министр бүгүнкү күндө Кыргызстанда кумшекер Казакстан менен Өзбекстанга салыштырмалуу арзаныраак экенин кошумчалады.