БИШКЕК, 15-май — Sputnik. Башкаруучу коалициянын курамына кирген "Италиялык Лига" партиясынын лидери Маттео Сальвини Финляндия менен Швециянын НАТОго кирүүсүн кийинкиге жылдыруу керектигин айтты. Бул тууралуу РИА Новости жазды.
"Азыр эмес. Дүйнөнү алсыратчу нерселердин баары кийинкиге калтырылышы керек. Украинага аскердик жардам катары курал-жарактарды жеткирүү жакшылыкка алып келбейт. Азыр аларга экономикалык жардам керек", — деген Сальвини.
Ошондой эле ал Италия Россия газы үчүн рубль менен төлөө мүмкүнчүлүгүн колдоорун билдирген.
Буга чейин Түркиянын президенти Тайип Эрдоган Анкара Финляндия менен Швециянын НАТОго кирүү процессине көз салып жатканын жана азырынча ага терс көз карашта экенин билдирген.
Эскерте кетсек, Финляндия менен Швеция көп жылдык нейтралдуулуктан баш тартып, НАТОго кирүү мүмкүнчүлүгү боюнча кеп кыла баштады. Альянстын башкы катчысы Йенс Столтенберг бул мамлекеттер аскердик блокко кирүүнү кааласа НАТО аларды тез кабыл алууну камсыздай турганын билдирген. АКШнын НАТОдогу туруктуу өкүлү Жулиан Смиттин айтымында, уюм Швеция менен Финляндия жакынкы айларда же жумада альянска кирүү боюнча өз алдынча чечим чыгарат деп күтүүдө. Ал Кошмо Штаттар бул мамлекеттердин НАТОго кошулуу чечимин колдой турганын кошумчалаган.
Россия эки өлкөнүн НАТОго кошулушун колдобойт. РФтин Коопсуздук кеңешинин төрагасынын орун басары Дмитрий Медведев эгер бул нерсе ишке аша турган болсо, чек араны бекемдөөгө туура келерин айткан. Себеби альянстын Россия менен болгон кургактагы чек арасы эки эсе узаргандыктан Москва НАТОнун агрессивдүү аракеттерине даяр турушу керек болот.