БИШКЕК, 16-ноя. — Sputnik. Москвада орус-кыргыз жаштары менен студенттердин жолугушуусу болот. Бул тууралуу Ломоносов атындагы Москва мамлекеттик университетинин алдындагы маалыматтык-аналитикалык борбору билдирди.
Иш-чара 17-ноябрдан 20-ноябрга чейин Россиянын Технологиялык университетинин базасында онлайн жана офлайн режиминде өткөрүлөт. Ал Россиядагы Илим жана технология жылына арналат.
Жолугушуу жаш окумуштуулардын, окутуучулардын, университеттин адистеринин, илимий уюмдардын кызматкерлеринин, жаштардын илимий жана билим берүү долбоорлорунун авторлорунун жана лидерлеринин ортосундагы диалог аянтчасы болуп калмакчы.
18-ноябрда саат 10:00дө Россиянын жана Кыргызстандын мамлекеттик органдарынын өкүлдөрүнүн катышуусунда салтанаттуу ачылыш болору айтылды.
Иш-чаранын илимий программасында "Академиялык чөйрө – жаштардын өнүгүү вектору" жана "Жаштар технологиялык бизнес-долбоорлору – стартаптар: тренддер жана келечек" аталышындагы темалар боюнча дискуссиялык аянтчалар болот.
Мындан тышкары, кесипкөй окутуучулар өзүн-өзү тааныштыруу жана команда түзүү көндүмдөрүн жогорулатуу үчүн тематикалык сессияларды өткөрүшөт.
Тематикалык аянтчаларда Москва мамлекеттик университетинин, Россиянын Илимдер академиясынын, Россиядагы элдердин достугу университетинин жана башка окуу жайларынын өкүлдөрү, ошондой эле Россиянын "Росатом", "Ростех" мамлекеттик корпорацияларынын өкүлдөрү спикер болмокчу.