БИШКЕК, 15-авг. — Sputnik. Афганистандын ички иштер министринин милдетин убактылуу аткаруучу Абдул Саттар Мирзаквал Кабул чабуулга кабылбаганын жана бийлик тынчтык менен берилерин айтты. Бул тууралуу жергиликтүү Tolo News телеканалына шилтеме кылып РИА Новости жазды.
Учурда талибдер бийлик менен сүйлөшүү үчүн президенттик администрациянын имаратына келди. Буга чейин алар Кабулга тынчтык жолу менен кирүү үчүн өкмөт менен байланышып жатканын айтышкан.
Ошол эле учурда Кабулдун түндүк жана түштүк четинде "Талибан" кыймылынын согушкерлери менен өкмөттүк аскерлердин ортосунда кагылышуу жүрүүдө. Бирок шаардын борбору тынч. Ички иштер министрлиги жашоочуларга бийлик калаанын коопсуздугун камсыздай турганын убадалаган.
Мурдараак талибдер Өзбекстан менен чектешкен Балх провинциясынын борбору Мазари-Шарифти жана өлкөнүн түндүгүндөгү бир катар ири шаарларды басып алганы айтылган. Мындан сырткары, согушкерлер эч кандай согушсуз эле Пакистан менен чек арадагы Нангархар провинциясындагы Желалабад аймагын ээлеп алышкан. Алар ошондой эле Афганистандын бардык чек ара бекеттерин көзөмөлгө алган.
Өлкөдөгү саясий туруксуз абал АКШ администрациясы 11-сентябрга чейин афган жеринен аскерлерди чыгарып кетүү убадасынан кийин курчуп жатат.
*"Талибан" — террордук уюм деп табылып, ага Россияда тыюу салынган