БИШКЕК, 27-май — Sputnik. Россиянын Бишкектеги Илим жана маданият борборунда Улуу Ата Мекендик согушта курман болуп, көзү тирүү маалында СССР тарабынан берилбей калган сыйлыктарды ардагерлердин жакындарына тапшыруу аземи болуп өттү.
Россиянын мамлекеттик сыйлыктарын РФтин Кыргызстандагы элчилигинин алдындагы коргоо маселелери боюнча атташеси Игорь Довбня тапшырган.
294-полктун аткычы, 1918-жылы туулган Калкаман Адамалиев (1943-жылдын 30-августунда 294-аткычтар полкунун командиринин буйругу менен) "Эрдик" медалы менен сыйланды. Сыйлык ардагердин кызы Бактыгүл Адамалиевага берилди.
"Сталинградды коргогону үчүн" медаль 138-аткычтар дивизиясынын аткычы, 1923-жылы туулган Петр Евдоковго (1942-жылдын 22-декабрында СССРдин Жогорку Советинин президиумунун жарлыгы) берилди. Сыйлык анын кызы Наталья Шведге тапшырылды.
Мындан сырткары, эки кыргызстандык Россиянын Коргоо министрлиги тарабынан берилген III баскычтагы "Издөө кыймылындагы артыкчылыктары үчүн" сыйланган. Сыйлык Каныбек жана Гүлнур Мырзакановдорго тапшырылды.