БИШКЕК, 26-апр. — Sputnik. Чүй облустук милициянын маалымат кызматы Кара-Балтада атышуу болду делген окуянын чоо-жайы тууралуу билдирүү таратты.
Бүгүн социалдык тармактарда кафелердин биринде бир жигит үлгүсү белгисиз курал менен атып жатканы көрүнгөн видео тараган. Мындан сырткары, камуфляж формасын кийгендер бир адамды кармап жатканы көрүнгөн.
Аталган факты боюнча Жазык кодексинин 266-беренеси ("Бейбаштык") менен сотко чейинки өндүрүш башталды.
Милиция ок атып жаткан жигит 20 жаштагы жергиликтүү тургун экенин аныктаган. Ал досу менен биргеликте актёрлорду жалдап кармоону уюштурган. Бул окуя 25-апрелде саат 18:00дөр чамасында болгон. Андан кийин атышкан жигиттин досу сүйгөн кызынын колун сураган.
Учурда тергөө иштери жүрүүдө, мындай оюндарды уюштуруу менен алектенген тараптар текшерилип жатканы белгиленет.