Бардык маселе каралып бүткөн соң добуш берүү башталды. Ал арада ЖМКнын өкүлдөрү кесиптешинин ордуна жашыруун добуш берген депутаттарга байкоо салып турду. Журналисттердин сунушу менен эл өкүлү Сайдулла Нышановдун жанындагы ноутбук өчүрүлдү. Ал эми Урмат Самаев менен Алмазбек Токторов да байкатпай добуш берүүгө аракет жасады. Бул учур кадрга түшүп калды.
Аны менен катар Уланбек Исмаиловдун ойлоп тапкан өзгөчө амалы да ачыкталды. Ал жанында отурган депутаттын ноутбугунун "чычканын" алдына тартып, иштебеген "чычканды" ноутбуктун маңдайына коюп койгон.
Жыйында алты мыйзам, бир токтом долбооруна добуш берилип, референдумду дайындоо боюнча маселе кийинкиге калтырылды. Мунун себебин төрага Талант Мамытов "аппарат кызматкерлери добуш берүүгө киргизген эмес" деп түшүндүрдү.
Белгилей кетсек, Жогорку Кеңештин регламентинин 85-беренесинин 4-пунктунда добуш берүү укугун башка депутатка берүүгө тыюу салынары жазылган.
Ал эми 86-беренеде мыйзам долбооруна таандык эмес маселелерде ишеним каттын негизинде эки гана фракциялашынын ордуна добуш бере алары көрсөтүлгөн.
Референдум дайындоо мыйзамына кеминде 80 депутат макулдук бериши керек. Ал эми бүгүнкү жыйында каттоодон өткөн эл өкүлдөрүнүн саны 84тү түздү.
Жаңы Конституцияны референдумга алып чыгуу мыйзам долбоору эртең, 11-мартта, үчүнчү окуудан каралары күтүлүүдө.