Ак илбирстердин төмөнкү сүрөттөрү Ысык-Көл облусундагы Сары-Чат-Ээр-Таш мамлекеттик коругунун аймагында тартылган. Ал жакта Snow Leopard Foundation in Kyrgyzstan уюму фотокапкандарды коюп, Айлана-чөйрөнү коргоо жана токой чарба мамлекеттик агенттигинин кызматкерлери менен биргеликте жаныбарларга санак жүргүзүп келет. Адистердин пикиринде, учурда Кыргызстанда 300дүн тегерегинде ак илбирс байырлайт, бирок алардын саны андан да көп болушу мүмкүн. Анткени республиканын бардык аймагында санак жүргүзүлө элек.
Ал жырткычтардын көпчүлүгү Батыш Тянь-Шань жана Памир-Алай тоолорунда жашайт. Ал жаныбарлар негизинен кулжа, тоо теке, доңуз, суур жана коён менен тамактанат.