БИШКЕК, 15-ноя. — Sputnik. Россия президенти Владимир Путин BRICS саммитинен (Бразилия, Россия, Индия, Кытай жана Түштүк Африка республикасынан турган биримдик) кийин журналисттерге маалымат жыйын өткөрдү. РИА Новости иш-чарада айтылган сөздөрдүн урунттуу учурларын сунуштайт.
Трамп менен мамилеси тууралуу
Путиндин айтымында, азырынча Дональд Трамп менен эч кандай жолугушуу пландалган жок. Бирок ал АКШлык кесиптешин Улуу Ата мекендик согуштун аякташынын 75 жылдыгына карата Москва шаарына келсе туура болот деген пикирин айтты. Ошондой эле Путин Россия Сирияга барганга чейин эл аралык коалициялар жарытылуу иш жасаган эмес деп эсептегени менен Трамптын терроризм менен күрөшүүгө салымы чоң болгонун моюндады.
Россиянын Сириядагы кызыкчылыгы тууралуу
Президенттин пикиринде, Россия Сирияга байланыштуу алдына койгон максаттарын дээрлик ишке ашырып бүттү. Россиянын негизги максаты — Араб өлкөлөрүнөн чыгып, Сирияда даярдыктан өткөн согушкерлерди Россияга киргизбөө эле.
"Мындай коркунуч Россияга гана эмес, Европа өлкөлөрүнө, жада калса АКШга дагы туулган. Бардыгыбыз коркунучтабыз. Андыктан күчтөрдү бириктирүү керек", — деди Путин.
Мындан тышкары, ал Россия киришкенде Сириядагы согушкерлердин 90 пайызы жок кылынганын жана көпчүлүк аймак Сириянын легитимдүү бийлигине өткөрүп берилгенин кошумчалады.
Зеленский тууралуу
Путин украиналык кесиптеши Владимир Зеленский менен "тыгыз байланышта" экенин айтып, Донбасстагы кырдаал боюнча сүйлөшүүлөрдө бир чечимге келүү маанилүү экенине токтолду.
Маалымат жыйын учурунда Путинден "Казакстандын мурдагы президенти Нурсултан Назарбаев сунуштагандай "Норман форматындагы" жолугушууларга чейин Зеленский менен кезикпейсизби?" деген суроо узатышты.
"Назарбаевдин сунушу тууралуу айтсам, ал жаш кезинде Украинада жашап билим алган. Андыктан бул өлкөгө жылуу сезимдери бар. Бирок ал ар дайым Украина бактысын океандын ары жагынан эмес, коңшулар менен мамилени жакшыртуу жолу менен издеши керек деген мааниде сунуштап келет", — деп жооп берди Россия лидери.
Анын айтымында, эки тарап тең "даярдыгы жок, шашылыш жолугушууларга" кызыкдар эмес, анткени алар үчүн жыйынтык өтө маанилүү.
Украина менен газ тууралуу сүйлөшүү
Путиндин айтымында, Россия Украинанын өзүнө арзан баада газ берүүгө жана ал аркылуу көгүлтүр от алып өтүп сатууга даяр экенин айтат.
"Украина бизден түз алса, 25 пайызга арзандатып берүүгө даярбыз. Ал эми газды Европага жеткирип, андан кайтарып алуу акылга сыйгыс нерсе", — деди Путин.
BRICS саммити Бразилияда 13-14-ноябрь күндөрү өттү.