БИШКЕК, 16-сен. — Sputnik. Талас облусунда өтчү Көчмөндөрдүн улуттук оюндарындагы ачылыш жана жабылыш аземиндеги коомдук тартип менен коопсуздукка милициянын 800гө чукул кызматкери көз салат. Бул тууралуу ИИМдин маалымат кызматынан кабарлашты.
Негизги иш-чаралар "Манас-Ордо" комплексинде, Талас шаарындагы ат майданда, "Газпромдун" ден соолукту чыңдоочу жайында жана спорт-интернатта өтмөкчү.
Оюндун катышуучулары менен коноктору жайгашкан мейманканалар жана конок үйлөрдү милиция кайтарары айтылды.
"Алардын коопсуздугун камсыздоо максатында тартылган күчтөр бардык тилкелерге коюлат. Күнү-түнү кызмат кылган нөөмөт уюштурулуп, милиция кайгуулдары иштейт. Андан сырткары, иш-чаралар өтө турган жерлерге милициянын көчмө кабылдамалары ачылат", — деп билдирди ИИМ.
Көчмөндөр оюндары өтүп жаткан учурда ИИМдин өздүк курамы күчөтүлгөн тартипте иш алып барып, коомдук тартипти сактоо максатында тиешелүү чаралар кабыл алынмакчы.
Эскерте кетсек, иш-чара 21-сентябрга чейин өтөрү айтылган.