БИШКЕК, 31-окт. — Sputnik. Премьер-министр Мухаммедкалый Абылгазиев Аламүдүн районунда 35 миң адамды жумуш менен камсыздайт деген "Silk Way" индустриалдык-логистикалык паркынын курулушуна капсула салды. Бул туурасында өкмөттүн маалымат кызматынан билдиришти.
Долбоор кыргыз өкмөтү тарабынан кабыл алынган Текстилдик жана тигүү өндүрүшүн өнүктүрүү боюнча программаны аткаруунун алкагында ишке ашырылууда.
"Silk Way Индустриалдык паркы" ишканасынын жетекчиси Адилет Кубанычбеков парктын аймагында бут кийим, текстиль продукцияларын өндүрүү боюнча 112 тармактагы фабриканын курулушу пландаштырылып жатканын айткан.
Абылгазиев аталган завод ишке берилсе ата мекендик продукцияны дүйнөлүк деңгээлге алып чыгууга өбөлгө болоору билдирди.
"Бүгүн чоң майрам. Анткени 70 гектар жерде жайгашкан жана 35 миң жумушчу орунду түзө турган көлөмдүү индустриалдык-логистикалык парктын курулушу башталууда. Аталган парктын салууга 200 миллион доллар сарпталат. Масштабдуу долбоорго тартылган каражаттын көпчүлүк бөлүгү жергиликтүү ишкерлердин инвестициясы. Аларды Кытай жана Түркиянын инвесторлору колдоого алды", — деди Абылгазиев.
Белгилей кетсек, долбоор ALPHA CARGO, Opal Mining Co.Ltd, YbHD Logistic Group жана Saphire Artstone Group компаниялары тарабынан ишке ашырылууда.
Курулуш иштери 2019-жылдын башында жана 2020-жылдын ортосунда эки баскыч менен жүргүзүлөт. Silk Way паркынын аймагында 6 негизги сектор болот.
Алар:
— Административдик-ишкердик курулуштар аймагы;
— Бажы-логистикалык терминал;
— Ири көлөмдөгү, кубаттуулуктагы транспортторду тейлөө;
— Өнөр жай жана административдик-коммуналдык курулуш аймагы;
— Парктык-рекреациялык аймак;
— Инженердик-техникалык аймак.
Мындан тышкары индустриалдык парктын концепциясында тигүү жана текстиль тармагындагы адистерди даярдоо боюнча кесиптик окуу жайын негиздөө камтылган.